* «Depresjon i seg selv er ikke nok for å få opphold i Norge,» seier statssekretær Libe Rieber-Mohn til Dagsavisen. Med atterhald om at ho er rett sitert, er det grunn til å merka seg denne utsegna. Kven har argumentert for at depresjon skal vera grunn til å få opphald i Noreg? Bakgrunnen for utsegna ovanfor er ein reportasje om flyktningar med alvorlege psykiske lidingar. Og for dei som veit korleis det er å leva på uvisse vilkår, kanskje i fleire år, er det lite overraskande i slike reportasjar. Forfølging i heimlandet og under flukta derifrå kan ha sett vonde spor. Men det er også mange som har fått knekt den psykiske helsa i løpet av lang og uviss ventetid i Noreg.