Maskinmennesket Terminator er eit av ikona i moderne amerikansk film, og ergo i den populærkulturelle verda elles. For dei som ikkje hugser tilbake til filmåret 1984, så er Terminator ein kyborg, og ein drapsmaskin – som namnet tilseier. Han er eit produkt av den kunstige intelligensen som i år 2029 har svidd av heile planeten og herskar over restane (dvs. USA). Men det finst ei ukueleg menneskeleg motstandsrørsle, leidd av ein John Connor. For å knekkja dén sender maskinane ein terminator tilbake i tid, til 1984. Oppdraget er å ta livet av Sarah Connor, mor til John, og såleis hindra at motstandsleiaren i det heile blir fødd.