Når skal vi slutte å late som folk er redde for kunst?

Har du vore på Nasjonalmuseet i det siste? Det har Kristopher Schau og Alexander Sandtorv. På oppdrag frå institusjonen sjølv har dei vandra gjennom Nasjonalmuseet rom for rom, utrusta med opptaksutstyr, opne sinn og fint lite anna. Resultatet er ein podkastserie med det velvalde namnet «Rom for rom i Nasjonalmuseet». Som dei to programleiarane understrekar i introen til kvar episode, er dei på ingen måte kunstekspertar, men derimot riktig så nysgjerrige på om Nasjonalmuseets akkumulerte rikdomar likevel kan greie å fange interessa deira.