Skulpturen som ble vekk

Kjære kommune­byråkrat, du er uerstat­teleg!

Då eg sat og las sakpapira til siste kommunestyremøte før ferien, kvapp eg til. Etter eit samandrag om sak PS 41/25 Inngåing av meirverdiavgiftsavtalar når private bygger offentleg infrastruktur for kommunal overtaking, stod det: «Samandraget er skrevet av chat GPT og kontrollert av administrasjonen.» Samandraget var eit samandrag av ei lengre saksutreiing, og oppløfta fyrst tenkte eg at kanskje det berre var samandraget KI skreiv, og så har byråkraten sjølv skrive utreiinga. Så kom eg til slutten av saksdokumentet: «Vurdering og konklusjon er skrevet av chat GPT og kontrollert av administrasjonen.» Her er konklusjonen: «Justeringsavtalar for meirverdiavgift er eit nyttig og lovleg verkemiddel for å fremje bustadbygging og infrastrukturutvikling i kommunane. Når dei vert brukt med klåre rutinar, godt dokumentert grunnlag og føreseielege fordelingsnøklar, gir dei både kommunen og utbyggjar gevinstar. Risikoen for kommunen er låg dersom avtalen er korrekt utforma og følgjer gjeldande reglar. Det er derfor tilrådd at fleire kommunar vurderer å etablere slike avtalar som del av sin bustad- og utbyggingsstrategi.» Eg er ingen ekspert på kunstig intelligens, men eg føler at den omstendelege administrasjonsstilen er sjaina opp med ein meir sjølvsikker Chat GPT-tone: «eit nyttig og lovleg verkemiddel…[som] gir både kommunen og utbyggjar gevinstar […] Det er derfor tilrådd at fleire kommunar vurderer å etablere slike avtalar».