5. juli
Ifo Denne sommaren har det vorte diskutert om folk som ikkje kjem frå Oslo, er mindre kule, eller kanskje prøver for hardt å vere kule.
Det store problemet med debatten, slik eg ser det, er at ingen av dei som har involvert seg så langt, er i nærleiken av å vere kule nok til å ha tyngde når dei pratar om kor kule andre er.
Eg kan uansett kjenne att problematikken frå då elevar frå dalføra rundt Førde kom inn til sentrum for å gå på skule.
Innflyttarplaga har vorte mykje diskutert og handlar om sosiokulturelle spenningar ved urbaniseringstendensar.
Den nederlandske journalisten Geert Mak skriv i boka «Europa» om gnissingane som oppstod mellom innflyttarar med tresko og parisarane på byrjinga av nittenhundretalet. Treskofolket kom frå Frankrike, men prata gjerne språk som dei innfødde i Paris ikkje forstod.
Hundre år seinare er nok etterkommarane deira parisarar gode som nokon og tenkjer kanskje at oslofolk flest ikkje har stil nok til å kjenne seg så mykje flottare enn dei som kjem flyttande til byen.
I Ifo-debatten er det nokon som hevdar at dei kan kjenne att folk som ikkje er frå Oslo, på ganglaget.
Det er slettes ikkje umogleg, for det er velkjent at folk frå ulike stader går i ulikt tempo og på ulike måtar. Richard Wiseman synte i 2008 at folk i Malawi brukte tre gonger så lang tid på å gå 18 meter som folk i Singapore.
Aleksander Åsnes