La Sodevika og Bøylestad leva

I Sodevika yrer det av liv, i sjøen og på land. Rett rundt neset, i Strømsvika, er det daudt. Støv frå steinbrotet som ligg heilt ned til kaikanten har lagt eit lokk over det som tidlegare var ein levande havbotn også der. Om det noverande fleirtalet i Lindesnes kommunestyre får det som dei vil, skal eit fleire hundre mål stort område med sørlandsk skjergardsnatur og landbruk sprengast vekk og erstattast av endå meir steinbrot og kaianlegg. Sett frå sjøsida ein vakker seinsommardag, kan verdiane i området ikkje teljast i kroner eller euro. På eit plankart, i kommunale sakspapir og sett frå styrerommet i entreprenørselskapa, stiller saka seg annleis.