Nidstonga har vore for lite opptatt av reklame! Det vart openbert under denne redaksjonsmedlemmens siste kinobesøk, då publikum vart usett for ein uendeleg lang, tam og uutgrundeleg film utan introduksjon, tekst eller tale. Filmkritikaren i meg burde kanskje setja pris på den søkande forma, som kravde at sjåaren tok aktivt del i tolkingsprosessen for å finna meining i dei poetiske bilda, men dei visuelle klisjeane var for uinteressante: Sveipade foto av urørt natur, av illevarslande miljøforureining og reine oljeplattformer. Tv-reportasjar av uidentifiserte, eskalerande konfliktar klipt i hop med bilde frå eit slags katastrofe-kontrollrom. Alt bunden saman av ein «problemfiksande», animert fargestraum ikkje ulik konvensjonell framstilling av Disney-magi, men denne Hollywood-fantasien var omdømmebygging frå norsk våpenindustri: «Kongsberg – Protecting People and Planet». GK