Nidstonga

I norrøn tid vart nidstonga, eit avkappa hestehovud på påle, reist over fiendar ein ville lysa ulukke over. I Klassekampen nyttar vi henne til å be nokon om å ta seg saman – eller leggja verksemda si på hylla. Denne veka la dei franske gravejournalistane i Disclose fram ein rapport som hevda at kjende Ikea-produkt som Baggebo-hylla, Kullen-kommoden og Brimnes-senga er produserte av fangar i Belarus. Det er ikkje første gong den svenske møbelgiganten er tatt for å lefla med diktatur, og ein treng ikkje å gå tilbake til Ivar Kamprads forhold til nazismen. NRK minner om at Ikea så seint som i 2012 «angra» på å ha brukt produkt laga av politiske fangar i tidlegare DDR på 1970- og 80-talet. Ifølgje Disclose-rapporten kjøpte Ikea-leverandøren Mogotex i 2019 tekstilar frå det belarusiske ungdomsfengselet IK-2, der direktøren er sanksjonert av EU på grunn av «umenneskelig behandling av politiske fanger».