NYTT PERSPEKTIV: «The Dawn of Everything» (2021) av David Graeber og David Wengrow.
Det er ikkje likegyldig kva historier som er i omløp. Folk som frå tidleg barndom er blitt fortalde at dei er fødde til å herska, har eit klart overtak på dei som har fått tuta øyra fulle med at dei er skapte til slaveri. Likevel kan det vera stridt nok på toppen av næringspyramiden òg, for terrenget stemmer jamt over så dårleg med kartet at det fører til nervøsitet og paranoia, sånn at herremenneska må dikta opp dekadenseteoriar og dolkestøytslegendar for å få det til å gå ihop.
