Er Ocasio-Cortez avslørt som Gucci-Helle?

Er det smart politisk aktivisme eller reint hykleri frå ein progressiv politikar å gå på sosietetsball i ein kvit kjole påtrykt teksten «Tax the Rich» – i sosialistraudt? Alexandria Ocasio-Cortez (AOC blant vener og «følgjarar») har fått sosiale media i USA til å gå av skaftet (igjen) denne veka, ikkje på grunn av ein ballkjole med eit politisk slagord (det var ho nemleg ikkje åleine om å ha), men fordi ho bar plagget til Met-gallaen, den årlege velgjerdsmiddagen til inntekt for Metropolitan Museum of Art, og den store kjendismotefesten i New York, med ein kuvertpris på over 30.000 dollar. «Uvurderleg», var sarkasmen frå den republikanske senatoren Ted Cruz.