Det nærma seg juleforestilling ved aktivitetssenteret og jul i ville vesten var eit tema. Ein brukar hadde fått rolla som Morgan Kane, og han gledde seg svært. Det var berre eit problem, – vi mangla hest. Vår Morgan var litt dårleg til beins, så eg spekulerte litt på korleis vi skulle løyse det. Men så måtte eg innom det lokale søppeldeponiet som snarast og blei liggjande etter ein bil med fullt hengerlass. Ut av lasset stakk det fire bein som likna umiskjenneleg på … Eg la meg på hjul og ved «Restavfall» fekk eg akkurat avverga ein katastrofe; At ein halvanna meter høg, fullblods glasfiberhest enda sitt liv.