Kulturarv til sals

På nyåret, før korona, blei to ulike patentsaker med kulturelt og spirituelt tilsnitt diskutert i offentlegheita. Sakene gjeld eigarskap til spirituelle symbol og kulturarv gjennom bruk av vår tids patentordningar: Kva tid er det legitimt å verna om eigne idear, produksjon og inntening, og kva tid må ein vedkjenna at noko høyrer til fellesskapet? Sakene – om høvesvis samisk og heidensk (norrøn) religion og identitet – er i det eine tilfellet avgjort, i det andre med uviss avslutning. Til liks med korona illustrerer dei grensetrekkingar og omsyn mellom individ og kollektiv, mellom einskildgrupper og globale fellesskap, forutan digitalisering av kommunikasjon og marknad.