Klassikar: Korleis kan ein god Gud tillate liding og vondskap? Forteljinga om Job viser fram det vondes problem.
Dei fleste av bøkene i Bibelen er litterære klassikarar, sjølv om dei færraste har funne vegen inn på pensumlistene i ålmenn litteraturvitskap. Den som har klart det, er Job. Ikkje utan grunn, for denne boka er eit av høgdepunkta i verdslitteraturen. Ein av dei store tematikkane ho tek for seg, er det vondes problem: Korleis kan ein god Gud tillate liding og vondskap? Job er nemleg ein rettskaffen mann som opplever å miste absolutt alt han har, så nær som livet. Kone, barn, rikdommen og helsa – ingenting er att. Job opplever så mykje vondt at han endar med å forbanne dagen han blei fødd.