- Det finst så mange grunnar til at nynorsken trengst. Ein av dei er sjølvsagt at ungdomspartia på borgarleg side hadde hatt lite å drive med i valkampen om Ivar Aasen ikkje hadde gjort jobben sin på 1800-talet. Både i Tromsø, Finnmark, Bergen og Oslo har det i år kome framlegg om å gjere sidemålet valfritt. Heldigvis er det lite som tyder på at det vil skje. Etter åtte års iherdig jobbing fekk Unge Høgre og Framstegspartiets ungdom endeleg si drøymeregjering på plass hausten 2013. Sidemålssaka hadde vore ei hovudsak for dei i valkamp etter valkamp. Resultatet? Ei regjering som vil «sette ned et utvalg som skal vurdere norskfaget med sikte på å styrke faget som språkfag, gjøre sidemålsundervisningen mer engasjerende for elevene og forbedre karaktersettingen». Gratulerer, Unge Høgre.