- Korleis byggjer vi landet vårt? Når vi set spaden i jorda i dag, er det for å reise bygg som skal stå i mange, mange tiår. Og då blir spørsmålet: Kvifor er så mange offentlege bygg så forferdeleg kjipe? I boka «Hundre års nasjonsbygging» viste Ulf Grønvold og ei rekkje medforfattarar oss korleis offentlege bygg hadde sett ut i perioden mellom sjølvstendet i 1905 og hundreårsjubileet i 2005. Det vi ser, er skular, sjukehus og togstasjonar som kneisar som små palass i bygder og byar. Viljen til å skape noko vakkert var til stades. Og i denne byggpolitikken ligg ein fin tanke: Dei vakraste husa våre, ja, dei eig vi i lag. At biblioteket, kunnskapens hus, eller rådhuset, demokratiets hus, er flotte, seier jo også noko om kva vi meiner er viktig.