Putins aksjar stuper

** Etter krigen i Irak frykta mange at USA ville straffe Kreml for å ha støtta Frankrike og Tyskland ved å sleppe store kvanta olje på marknaden, og slik presse prisane ned på eit nivå der vår økonomi ganske enkelt ville ligge med buken opp. Men dette scenariet var lite truleg – ikkje fordi det noverande Kvite huset er kjend for si vilje til å tilgje og gløyme, men fordi slik dumping ville skade amerikanske oljeselskap i større grad enn sine russiske motstykke. Å brenne ned huset for å bli kvitt kakerlakkar er kanskje eit farbart val for dei russiske leiarane, men ikkje for dei pragmatiske amerikanarane, ikkje ein gong med president George W. Bush ved roret. I staden for å overfløyme marknaden med billeg olje valde det amerikanske leiarskapet å fylgje ein meir effektiv og omfattande strategi. Når irakisk olje tek til å flyte att, vil oljeprisane gradvis gå ned, men dollaren vil falle samtidig. Dette gir den amerikanske økonomien fleire føremoner. Den amerikanske innanlandske marknaden vil i stor grad halde seg stabil. Råvarekostnaden vil gå ned, men ikkje nok til å ruinere dei selskapa som tilbyr dei. USA sin eksport vil verte meir konkurransedyktig, og handelsbalansen vil forbetre seg. Viktigast er det at USA si utanlandsgjeld vil krympe sidan verdien til dollaren fell. Amerika sine konkurrentar vil kanskje vere nøgde med styrken til euroen, men Europa sin noverande depresjon vil berre forverre seg som eit resultat.