Rett før helga sende Norsk filminstitutt (NFI) ut pressemelding om at spelefilmen «Uten tittel» med regi og manus av Eskil Vogt er tildelt ti millionar kroner i produksjonstilskot etter kunstnarisk vurdering. Det er ei meir oppsiktsvekkjande melding enn den jamne filminteresserte kunne tru. Tildelinga kom nemleg på fjerde søknadsforsøk etter at «Nordens mest meritterte manusforfattar» hadde fått tre blanke avslag. Det siste kom i mai – dagar etter kulturminister Lubna Jafferys hyllingsmottaking for teamet bak Oscar-vinnaren «Affeksjonsverdi» med regissør Joachim Trier, medmanusforfattar Eskil Vogt og produsent Maria Ekerhovd i spissen.