No er praidsesongen over oss igjen. Praid held på å følgje det same utviklingsmønsteret som jola. Ein fest som tidlegare varte ein dag eller to, har teke over ein heil månad, jola har teke over minst to, og under den tida blir me bønnfalle om å fylle opp kjøpekorgene våre med merch. Juggelfabrikantane tener ein god slant på dette, og sidan både økonomien og livet er hardt, får me nesten berre unne dei det. Både kristne og ikkje-kristne elevar feirar jol på ulike vis, men ein del kristne foreldre ser seg nøydde til å samle inn pengar som dei elles kunne ha donert til vettuge føremål, for å verne avkommet mot synet på regnbogeflagg. Det høyrer også med til årstida at regnbogeflagga blir rivne ned, og heiste opp att. Dette har både lokalavisene og flaggfabrikantane glede av.