Dei første oljearbeidarane på norsk sokkel arbeidde under direkte helseskadelege forhold. Dei nærmast vassa i farlege kjemikaliar, og verneutstyret bestod gjerne av ein tynn kjeledress og kanskje eit munnbind på snei. Unge, sterke og friske menn fekk etter kvart påvist omfattande helseskadar. Fleire har døydd i ung alder, andre hamna på uføretrygd. I 20 år har nokre av dei overlevande kjempa ein ny kamp, for anerkjenning og erstatning. Og i desember i fjor såg saka ut til å nærma seg ei verdig avslutning då eit samrøystes Storting vedtok at oljepionerane skal få ei særskilt kompensasjonsordning.