I pinsa gav Den heilage anden apostlane evna til å snakke og forstå framande språk. Denne opplysingstanken, som ligg til grunn for misjoneringa og utbreiinga av kristendomen, deler ikkje byrådet i Bergen. I pinsehelga omkalfatra dei heile leiinga i kraftselskapet Eviny. Berre dagar før generalforsamlinga tysdagen etter pinse ville dei byte ut styreleiaren og eine styremedlemet i selskapet. Dei andre eigarane, Statkraft som den største og 18 andre kommunar, visste ingenting. Dei måtte, som alle oss andre, lese om det i Bergens Tidende.