Forfattar Jo Eggen utfordrar meg (5. januar) til å svara på om eg kan tilrå Noreg som reisemål med tilvising til at underteikna har «hisset seg opp» over at Gérard Depardieu «reiser til Hviterussland [eller Belarus, som eg skreiv] og Nord-Korea». Eg gjev ikkje råd om reisemål, og kommentaren min (3. januar) handla heller ikkje, som forfattaren nok forstod, primært om reising. Snarare ville eg seia at det er uklokt av kunstnarar å kasta stjerneglans over både eigne og andre land sine statsleiarar (som Depardieu gjorde over Aleksandr Lukasjenko) også når dei ikkje er diktatorar, kan eg legga til. Kvinneforakt (som Depardieu har vist både i Nord-Korea og Frankrike) er eg i mot anten uvesenet kjem til uttrykk innanlands, utanlands, på jobb eller ferie.