Etter eit år med rask vekst i tal på medlemmar og eit godt lokalval i september så stormar det no rundt det ferske Industri- og næringspartiet (INP).

Førre veke skreiv Klassekampen at fleire tek til orde for å kaste han som har stifta, bygd opp og er vald til å leie partiet fram til minst 2026.

Partileiar Owe Ingeman Waltherzøe seier at det finst krefter i partiet som ønskjer å dra partiet i ei anna retning, og at det er ein kamp å halde på INP som eit sentrumsparti.

– Vi ønskjer å ta vare på dei norske tradisjonelle sosialdemokratiske verdiane. No er det krefter som er mørkare enn dei partiet er tufta på, som forsøkjer å dra partiet i si retning, seier Waltherzøe.

No har Waltherøe bestemt seg for å ta ein friperiode, og fram til våren skal Joar Nesse frå Bomlø vere fungerande leiar.

Skal vere velferdsparti

INP har på kort tid vekse kraftig som parti og har mellom anna fått fleire medlemmar enn landets eldste parti, Venstre.

Partistiftar Waltherzøe har vore open om at han som leiar har fått litt meir makt enn det som er vanleg i andre parti, men at bakgrunnen for det er at han har sett korleis andre nystifta parti har vore sårbare for å bli kapra av ulike politiske grupperingar.

Waltherzøe har i fleire år vore fagforeiningsmann, og han er oppteken av at INP er eit sosialdemokratisk parti.

No har han over tid merka at det ikkje er alle som har kome inn i partiet som delar det verdisynet.

– INP er og skal vere eit velferdsparti. Vi skal sikre at vanlege folk har ein plass rundt bordet i middelklassen, og vi skal sikre arbeidsfolk og deira rettar. Det er mykje makt og påverknad i eit parti som INP, og no er det fleire som kjem inn og vil utnytte det, seier partigründeren.

Ville kasta leiaren

Førre veke skreiv Klassekampen at leiar i Moss INP, Svein Stensrud, i lag med fleire andre i partiet ville kaste partileiar Owe Ingeman Waltherzøe.

No er Stensrud glad for at Waltherzøe har teke seg fri ein periode, og han seier at partiet har mykje arbeid å gjere framover.

– Det med å finne ut kva slags parti vi skal vere, og kva som er verdigrunnlaget vårt, er jo noko av det vi lyt bruke tid på framover.

– Kjenner du deg att i at nokre har ønska ei høgredreiing i partiet?

– Nei, ikkje frå min ståstad. Eg er samd i at INP skal vere eit parti som ser etter løysingar både til venstre og til høgre. Eg trur bråket i partiet handlar om at vi merkar litt veksesmerter, og at nokre har teke på seg for mykje arbeid, seier Stensund.

Innvandring er viktig sak

Klassekampen får stadfesta frå fleire at innvandring er ei av dei sakene som har ført til litt splid i partiet.

«Det er ­mykje makt og påverknad i eit parti som INP, og no er det fleire som forsøkjer å utnytte dette.»

— Owe Ingeman Waltherxøe, partileiar i INP

Fungerande leiar i INP, Joar Nesse, seier at innvandring er ei sak som er mykje diskutert, men at innvandringspolitikken til partiet ligg fast:

INP respekterer dei internasjonale forpliktingane som Noreg har, og seier at når det oppstår krigar, så vil det kome flyktningstraumar. Det er klart at Noreg då må ta eit ansvar i lag med andre land, seier han.

Nesse fortel at INP sin politikk er at Noreg lyt bli betre på integrering av dei som kjem.

– Du kan berre tenkje deg sjølv korleis det er å bli sitjande på eit asylmottak og ikkje få lov til å jobbe. Vi må bli mykje betre på å få dei som kjem, ut i jobb, slik at dei kan bruke kompetansen sin. Så kan det også hende at vi som samfunn kan bruke endå meir pengar på å hjelpe asylsøkjarar i nærområda når det oppstår krig og konfliktar, men ikkje utan at Noreg varetek dei forpliktingane vi har internasjonalt, seier Nesse.

Sjølv om Nesse no skal vere fungerande partileiar i nokre månadar, har han ikkje problem med å gje attende leiarklubba til Waltherzøe når den tid kjem.

– Owe er valt til leiar til 2026, så den saka er heilt grei.

Lugn stemning i Bergen

Etter kommunevalet i haust enda INP opp med å samarbeide med ulike parti fleire stader.

I Bergen har partiet vorte støtteparti til det nye høgrebyrådet leia av byrådsleiar Christine Meyer (H).

Ho seier at skule, eldreomsorg, psykisk helse og generell helsepolitikk er fanesakene til INP i Bergen.

I tillegg til motstand mot bybane over Bryggen.

– Årsakene til bråket i partiet er komplekse, og eg trur i alle fall ikkje vi i Bergen og vårt støtte til det nye byrådet har bidrege til det. Her i Bergen er det lugnt, sjølv om det sjølvsagt har sine utfordringar.