Boy from Heaven
(Sverige, 2022) Regi og manus: Tarik Saleh Thriller, 2t.06min., Kino
Den fromme fiskarsonen Adam (Tawfeek Barhom) er den første i ein fattig familie til å ta utdanning – og ikkje kor som helst. Landsbyimamen har sytt for at den gåverike guten har fått plass ved Al-Azhar-universitetet i Kairo. Verdas største islamske universitet har eksistert i over 1050 år og er enno ein av dei mest autoritative institusjonane i sunniislam. Difor skapar det panikk – både blant teologisk rivaliserande lærarar og i den egyptiske tryggingstenesta – når den gamle storimamen ved Al-Azhar døyr på starten av studieåret. Dødsfallet løyser nemleg ut eit nyval, som er omkransa av like mange intrigar som pavevalet.