Ragnar Aalbus biletbøker har noko tiltalande ved seg: Eit dempa, sjarmerande grafisk uttrykk, tydelege typar henta frå dyreverda i hovud­roller – Harry og Roger (okse og mår), Ellefsen og Tollefsen (elefant og elg) – og ikkje minst, for dei som likar slikt, ordspel i titlar og tekst. No veit eg at mange ikkje likar slikt, men sjølv er eg svak for ordleiken som oppstår i boka om nemnde Ellefsen og Tollefsen, «Bare rør» (2020). Dei to driv eit transportfirma som fraktar lange ting – stolpar, stokkar, rør. «Ikke rør» står det på eit skilt ved ein stabel rør utanfor hovudkvarteret deira.