SAMFERDSEL: Talet på passasjerar i kollektivtrafikken aukar frå første kvartal til andre kvartal i år, men er framleis lågare enn før koronapandemien. Kollektivtransporten hadde ti millionar fleire passasjerar i andre kvartal 2022 enn i første kvartal, ein auke på 7 prosent, viser tal frå Statistisk sentralbyrå (SSB). Samtidig viser tala at talet på passasjerar i andre kvartal i år er 92 prosent av talet i same kvartal i 2019. Tala viser at alle kollektive transportformer har hatt passasjervekst frå førre kvartal. Talet som reiser med buss er 6 prosent lågare enn same kvartal i 2019, før pandemien, medan togtrafikken ligg 16 prosent lågare enn før koronaen slo til. ©NPK