EU vil gjere seg mindre avhengig av gassimport frå Russland og akselerere utbygginga av fornybar energi kraftig.

Den nye tiltakspakka «Repower EU» frå EU-kommisjonen inneber mellom anna at nye konsesjonar for å byggje vindkraft på land skal verte handsama mykje raskare enn før.

«Bør ikkje bli norsk lov»

Regjeringa har sendt forslaga på høyringa for å vurdere å gjere tiltaka til norsk lov, men høyringa går midt på sommaren og raskare enn det som er vanleg. Fleire parti på Stortinget er svært skeptiske til pakken frå EU. Dette skyldast at vi i Noreg har lagt bak oss fleire konfliktar knytt til vindkraft. I tillegg er det no semje på Stortinget om at lokalsamfunn og kommunar må få ei hand på rattet når konsesjonar for å drive vindkraftverk skal verte handsama.

I forslaga til EU-kommisjonen blir det lagt opp til at hastigheit skal trumfe omsyn til både lokal forankring og grundige miljøundersøkingar.

– Det er mykje bra i Repower EU-pakken, men den delen som går på vindkraft på land, bør bli halde unna EØS-avtala og bør ikkje blir norsk lov, seier energipolitisk talsperson i Frp Terje Halleland.

Han meiner at det er så viktig å lytte til lokalsamfunna i utbygging av vindkraft at det må trumfe EU sine nye ambisjonar om å handsame vindkraftsøknadar svært raskt.

– Heile denne tiltakspakken handlar jo om EU sitt behov for å gjere seg mindre avhengig av russisk gass, seier Halleland og held fram:

– Krigen i Ukraina har forandra europeisk energipolitikk, og det er fornuftig at EU vil ta desse grepa. Avhengigheit av russisk gass er likevel ikkje ei utfordring for Noreg.

Venstresida reagerer

Energipolitisk talsperson i Sosialistisk Venstreparti Lars Haltbrekken er også kritisk til å innføre europeisk hurtighandsaming av vindkraft her i landet.

– Det er heilt avgjerande at vi har grundige miljøundersøkingar på førehand når vi skal lyse ut både landvind og havvind her til lands.

Haltbrekken understrekar at «undersøkingar i regi av det offentlege må vere det styrande her, og ikkje hastigheita på prosessen».

«Det er veldig skremmande at dette no går litt under radaren»

— SOFIE MARHAUG (RAUDT)

Energipolitisk talsperson i Raudt Sofie Marhaug likar dårleg at regjeringa har sendt tiltakspakken frå EU på høyring midt på sommaren, og at heile prosessen har gått under radaren for mange.

– Det er veldig skremmande at dette no går litt under radaren. Om det syner seg at det ikkje kjem inn så mange høyringssvar no, i ei sak med så mykje engasjement, så kan det tyde på at regjeringa legg det opp på ein sleip måte, seier ho.

«Eit kappløp»

Sjølv om Halleland i Frp er skeptisk til det som kan bli EU sitt nye regime for vindkraft på land, meiner han at Noreg bør bli med EU på å innføre ei raskare handsaming av vindkraft til havs.

– Når det gjeld havvind, så er det rett og slett eit kappløp som no går føre seg, og der har ikkje Noreg råd til å halde på med våre enromt lange handsamingstider, samstundes som det etter kvart vil gå berre to år med heile prosessen for å byggje havvind i EU, seier han og held fram:

– Då kan det ikkje ta ti år i Noreg. Då taper vi den konkurransen, og det er uansett ikkje sikkert at alt alltid blir så mykje betre ved å bruke veldig lang tid.

Tiltakspakken «Repower EU» er altså på høyring no, og høyringa vert avslutta i byrjinga av august. Før den tid ønskjer ikkje regjeringa å seie så mykje om kva dei tenkjer om dei ulike forslaga.