Då eg lét att Kristin Auestad Danielsens nye roman «Du er bonde» etter lesinga, visste eg knapt bak og fram, eller for så vidt opp og ned eller inn og ut på boka. Her er det kort sagt mykje av mangt – hjortebukkfedrar og uslitelege navlestrengar, genetisk nøttelengt og gudgitte visjonar om å gjere kulturlandskapet vilt igjen, Lady Diana og Britney Spears. Og så den ugløymelege svenske slageren frå Fula visboken, då, som eg likevel hadde gløymt eller i alle fall fortrengt: Her ljomar ‘Brittas fitta’ på repeat over campingvognene på landsleiren til Norsk Bygdeungdomslag – i fire dagar til ende.