OSLO: Frp støttar SV-forslaget om ikkje å slå saman politistasjonane i Groruddalen og sør i Oslo til éin. Dermed er det fleirtal for forslaget. Ifølgje Aftenposten tok Frps stortingsgruppe avgjerda i går ettermiddag, og saka skal etter planen behandlast i Stortinget før jul. – Færre politistasjonar fører ikkje til meir nærleik. Ein får ikkje store driftsfordeler når politieiningar blir slått saman. Nærleik vil skape større tillit til politiet. Det blir òg lettare å drive førebyggjande arbeid, seier Frps Christian Tybring-Gjedde. Senterpartiet og Arbeidarpartiet støttar òg forslaget. Planane om å slå saman politistasjonane på Stovner og Manglerud vart kjend i mai. ©NPK