Kva skjer når vi overlèt «tenkinga» til maskinar og dei einaugde mennene som programmerer dei?
(Noreg, 2019)
Regi og manus: Tonje Hessen Schei
Med: Jürgen Schmidhuber, Ilya Sutskever, Michal Kosinski
Lengde: 1 t. 39 min.
«iHuman» er tragisk ironisk ein av dei viktige filmpremierane som no er råka av korona-stengde kinoar. Vonleg vil filmen få snarleg online-distribusjon. «iHuman» handlar nemleg om uetisk og uregulert bruk og nyutvikling av algoritmar, dei matematiske «oppskriftene» som den digitalstyrte verda er bygd på. Desse elektroniske verktøya blir no brukte av verdas helsestyremakter til å kalkulera virusspreiing (du har kanskje sjølv spela «Infected»?) og til å underbygga tiltak mot pandemien i den fysiske verda.
