Ein rosa sokk med einhyrningar er det første vi ser av Benni (Helena Zengel). Jenta er ni år – ni og trekvart, som ho sjølv presiserer – og ser til forveksling ut som sine jamaldringar. Men det er før kamera avslører at kroppen hennar er dekt av blåmerke, og at ho ligg i sokkelesten på sjukehuset. Det er ikkje siste gong vi får sjå henne slik, og av Bennis oppførsel forstår vi at besøket for lengst er rutine.