Jaså, gitt. Rusa, norske finansspekulantar er som andre rusa finansspekulantar vi har sett på film. Spennande, spennande, spennande. Det er lett å harselera med «Exit» alt før ein har sett serien, som NRK omtalar som «viktig». Dei åtte halvtimesepisodane om Tjuvholmen-firkløveret Adam, William, Henrik og Jeppe er, slik vi har fått høyra mange gonger i førehandsomtalen av serien, basert på eit journalistmøte med fire verkelege finansmenn på hotellet The Thief med «kort i baren og mikrofon på bordet». Serien er altså presentert som ei «tell all»-historie frå norsk finansmiljø. Vonleg finst det alternative forteljingar, også frå dette miljøet.