Den siste månaden har tv-serien «Chernobyl» fått mykje merksemd og vekt medvit om kjernekraft på ny. Serien følgjer det teknologiske, politiske og etter kvart juridiske dramaet som spelte seg ut rundt Tsjernobyl i 1986, og gir eit inntrengande og ganske truverdig bilete av staden og tida rundt katastrofen. Fiksjonsserien har blitt kritikarrosa, men også fått refs for faktafeil, for å fiksjonalisere for mykje og overdrive, og for å forteikne måten makt og frykt fungerte på i Sovjetsamveldet. I det amerikanske business-magasinet Forbes (6. juni) har ein kjernekraftentusiast sett serien. Han er skuffa over at den ikkje viser kor ufarleg kjernekraft er, og at den ikkje forklarar «det paradoksale forholdet mellom tryggleik og fare» i «den sanne historia om kjernekraft» for tilskodaren.