Black Lives Matter-dramaet «The Hate U Give» har unekteleg ein litt didaktisk tone, som tidvis gjer filmforteljinga til ei sjekkliste for politiske poeng. På den andre sida er dette poeng om systematisk sosial ulikskap, rasisme og vald som både politikarar og veljarar i USA har ganske tungt for å ta inn over seg. Dessutan er det oppløftande å sjå eit romantisk ungdomsdrama som er så dagsaktuelt politisk engasjert utan å gå vegen om allegorisk fantasy, og utan å munna ut i individuelle løysingar på institusjonelle problem. All heider til regissør George Tillman Jr. for det, jamvel om slutten kanskje er vel roseraud til å vera realistisk.