Mangelen på sorg og sakn då mora døydde, fekk dokumentaristen Steffan Strandberg til å retta kameraet mot seg sjølv og si eiga familiehistorie. Han hadde ikkje snakka med mora på over ti år og tok ikkje telefonen når ho ringte om nettene. Var han kjenslekald? Mora sa jo alltid at ho elska Steffan og veslebroren Robert. Eller hadde Steffan drege for lenge på minna om ei mor som valde å drikka bort barndomen til smågutane sine i staden for å laga middag og få dei trygt i seng om kvelden.