Det er dårleg stil å byrje ei bokmelding med å kommentere korrekturfeil, men det er også dårleg stil å byrje ei bok med ei innhaldsliste med minst åtte korrekturfeil: Fleire av tekstane i Claire-Louise Bennetts «Dam» har ein tittel i brødteksten og ein avart i lista. ‘Å, tomatpuré!’ opnar med ei skildring av tomatpuré «som noe overstrømmende, friskt og sydende», men er ortografisk amputert i innhaldslista, og først servert som den utkokte, tamme og tafatte ‘Å tomatpuré’. Den nydelege, forstyrrande og litt irriterande boka til Bennett, som er omsett av fjorårets kritikar-prisvinnar Anne Arneberg, og som eg kjem til å lese fleire gongar, er skjemd av bortfalne ord og fråfall frå den å, så viktige teiknsetjinga.