Ifølgje førebelse berekningar frå Statistisk sentralbyrå er talet på personar som arbeider i petroleumsretta verksemd redusert med 50.000 på tre år, frå 232.000 i 2013 til 182.000 i 2016. Rett nok har ikkje alle av desse blitt arbeidsledige. Mange av dei som har blitt ramma av redusert aktivitet frå petroleumsverksemda, arbeider innanfor tenestesektoren. Fleire av desse arbeider truleg i dag med produksjon retta mot andre sektorar, og ein del også på den same arbeidsplassen dei hadde før petroleumsnedgangen. Men at mange har tapt jobbane veit vi, og det har hatt store ringverknader, særleg i dei område av landet der tapet av arbeidsplassar har vore størst.