- «Heller ikke forsker Lurås mener at Norge skal melde seg ut av NATO (…)», skreiv Frank Rossavik i Aftenposten 21. mars. 18. november i fjor skreiv Aftenbladet at «Forsker mener Facebooks franske bilder tjener IS» om ei sak der «forsker Helge Lurås» får uttale seg. Og i januar i fjor skreiv Klassekampen om sjansen for fred i Syria: «Brikkene ligger ikke til rette for fred, sier forsker Helge Lurås.»
- Lurås signerer sine mange kommentarar og artiklar med «Leder for Senter for internasjonal og strategisk analyse» (Sisa). På heimesida til senteret, som held til heime hos Lurås, står det at grunnleggjaren har «erfaring fra Norsk Utenrikspolitisk Institutt». Det er vel dette som får folk til å tru at han er forskar, men denne erfaringa er som presserådgjevar. Lurås er siviløkonom og cand.mag. med sosiologi, idéhistorie og antropologi. Han har inga utdanning i tryggleikspolitikk. Han har knapt skrive akademiske bidrag, men skreiv boka «Hva truer Norge nå?» i fjor. For mange er han mest kjent for å ha lagt skulda for 22. juli på muslimane: «Det er naturlig at vi først tenker på at dette har noe å gjøre med konflikten vi har sett mellom Vesten og radikale former for islam i lang tid», uttalte Lurås om ettermiddagen 22. juli.
- På heimesida til Sisa er til saman elleve personar oppført under fana «Medarbeidere», men på bedriftsnettstaden Proff.no viser rekneskapen at Sisa berre har hatt inntekter på om lag ein halv million i året i perioden 2012–2014.
- Lurås står i sin fulle rett til å meine og skrive alle dei kronikkane han vil. Men når han denne veka skriv ein omdiskutert kronikk om islam, der han seier at «Donald Trump ser ut til å ha forstått det. Det er klart at man kan bygge murer», så må vi hugse éin ting: Dette er ikkje orda til ein forskar.
Jens Kihl