I den offentlege debatten om skattlegging blir sparing og realinvestering (i fysiske produksjonsmiddel) begrepsmessig sausa saman og oppfatta som eitt og det same. Finansministaren tviheld på at skattesystemet må stimulere sparinga som så skal gi fleire arbeidsplassar. Ein grunn til at representantar for heile det politiske spekteret tek denne samanblandinga for god fisk, kan vere dårleg økonomisk journalistikk. Ein annan grunn er at Keynes’ teori er effektivt fortrengd, og at denne røra derfor er ein gjengangar i mainstream artiklar og lærebøker i økonomi, jamfør til dømes den såkalla Solow-modellen for økonomisk vekst.