Dei unge asylsøkjarane på Vestlandsheimen i Bergen får tverrpolitisk støtte frå bystyret når dei seier nei til å bli tvangsflytta til andre asylmottak.
Det er alvorlege unge menneske vi møter på asylmottaket Vestlandsheimen i Bergen. Ramin (17) frå Afghanistan har vore i Noreg i to år. Han har ingen familie her, og han fortel at foreldra hans er døde. Siavash Ehtemani (17) kom åleine til Noreg for 14 månader sia. Mor og søster er att i Iran. Ei tante og tre søskenbarn i Bergen er dei einaste slektningane han har i Noreg, og så lenge han bur på Vestlandsheimen kan han treffa dei ofte. Simon (17) frå Eritrea har budd i Noreg i to og eit halvt år.