Ein uheldig konsekvens av den journalistiske profesjonaliseringa er at journalistane ofte blir sentrum i nyhenda, og tar fokuset vekk frå det dei rapporterer om. Ofte må journalistane sjølve ta skulda for ei slik avsporande personfokusering, men ikkje alltid. Åsne Seierstad er eit av unnataka. Ho er ein av dei mest profilerte norske krigsreporterane og har i løpet av få år, men mange krigar (Kosovo, Afghanistan og Irak), bygd seg opp relativt brei erfaring. Slik kunne hennar journalistiske praksis vore eit utmerka utgangspunkt for å drøfta krigsreporterrolla i dag, med den nye typen mediekrig, der raske formidlingskanalar stiller eit enormt krav om å levera stoff som skal fylla sendeflater og nettsider 24 timar i døgeret, sju dagar i veka. I tillegg til alle innhaldsmessige problemstillingar ein blir stilt overfor, til dømes i møte med krigførande partar som sjølve legg sine medieinnretta propagandakrigsstrategiar. «Embedded» er vårens medie-nyord.