– Synet på kroppen vår er avhengig av kontekst, samanhengen den står i. Opp gjennom historia har menneskets oppfatning av kva kropp er vorte endra, slik også biologien sjølv har endra og utvikla seg, seier Linda M. Rustad, kjønnsforskar ved Senter for kvinne- og kjønnsforsking, Universitetet i Oslo. Ho er grunnleggjande usamd med Iver Mysterud, evolusjonsbiologen som til Klassekampen sist laurdag hevda at vi har kroppen til ein jeger frå steinalderen, men at vi kulturelt lever i dataalderen. Mysterud meiner vi kan forklåra ei rad sjukdommar med at kroppane våre ikkje er godt nok tilpassa det moderne miljøet, og han vil gje aggressive kriminelle omega-3 og mindre sukker for å endra åtferda deira. «Det sosiale miljøet [er] mindre viktig for menneska enn vi tidlegare har trudd» hevdar evolusjonsbiologen.