Denne veka reiser vi ei nidstong over alle som snakkar ned «unge menn» i generelle ordelag! Både dei som er uroa for samfunnsrolla til «unge menn», og dei som irriterer seg over testosteron-brushanar med «entitlement-syndrom». Ein del synest nok at «unge menn» har godt av å kjenna korleis det er å bli skoren over ein statistisk kam, men kven har vorte eit betre menneske av å bli og slått i hartkorn med stigmatiserande gruppekarakteristikkar? «Unge menn» toppar all risikostatistikk, «unge menn» fell gjennom på skolen, «unge menn» røykjer igjen, «unge menn» dusjar i parfyme og knaskar kreatin tørt, «unge menn» ville røysta på Trump om dei kunne, og sanneleg er dei for EU også. Ankepunkta peikar i mange retningar, for «unge menn» er så mangt, men alle er dei ein del av framtida! Gje ein ung mann litt kjærleik, om han «fortener» det eller ikkje. GK