Dei fleste land overfører pengar frå statskassa til landbruket, for å oppretthalde nasjonal matproduksjon, hjelpe fram drift under vanskelege naturvilkår, fremje mateksport eller favorisere somme bønder. Håvard Teigen skriv i Klassekampen 4. juni om vårens norske jordbruksoppgjer og at botnfrådraget er auka frå 6000 til 11.000 kroner. Om ein småbrukar har areal og drift til 20.000 i produksjonsstøtte, får han altså berre 9000. Eg deler synsmåten at det er ille og ønskjer å supplere noko. Dette handlar ikkje først og fremst om at småbønder treng inntekter, men om at storsamfunnet er tent med meir matproduksjon i det små.