I år har ein av norsk films mest omtalte filmar 50-årsjubileum samstundes som filmskaparen fyller 85 år. Anja Breiens «Hustruer» er ein dramakomedie om tre gifte kvinner, som går på rangel medan dei drøftar ekteskap, fridom og ansvar for eigne liv. Filmen kom ut i FNs kvinneår og trefte tidsånda i 1975 då han vart sett av over 200.000 på kino. At Breien seinare følgde opp hovudrollene i endå to filmar ti og tjue år etter, gjorde «Hustruer» til eit unikt norsk filmprosjekt. Hustruer-filmane er Breiens mest kjende ved sida av «Den allvarsamma leken» (1977) eit psykologisk studium av kjærleik i ulike stadium bygd på Hjalmar Söderbergs roman.