Den 25. april 1975 var det årsmøte i Hitra Meieri. På slutten av møtet reiste mjølkebonden Sverre Hanssen frå Tranvikan seg og tok til orde for skattestreik. Han sa at dersom utviklinga med låg inntekt og nedlegging av bruk held fram, ville jordbruket forsvinne, ikkje berre på Hitra og Frøya, men i heile kongeriket. På få år, frå 1960 til 1975, hadde talet på leverandørar til Hitra meieri gått ned frå 435 til 160. Den innflytta nordlendingen meinte at tida var inne for ein kraftfull protest. Skatten må settast inn på sperra konto for å få politikarane og staten til å forstå og snu.