Ho veit kor den ligg. Ho veit kor det meste ligg. Før var kartet over kvardagen heilt klart. No hender det at ho skriv ein gul lapp om ein sjeldan brukt ting og legg han i øvste kommodeskuffa. Ho skal til doktoren og har tatt på seg eit smalt, svart skjørt, bluse med krage og lett jakke. På hjartesida av jakka har ho festa ei brystnål i sølv og emalje, ein blå og kvit fugl denne gongen. Ho har andre brystnåler og. Dei må ha rett farge til kleda ho ber. Fint kledd må ho væra når ho skal til doktoren. I går dusja ho og sette plastrullane i håret. No har ho greidd det frå panna og lagt krøllane til rette.