I 2011 laga NRKs eminente radiodokumentarist Kari Hesthamar eit portrett av den då 76-årige Marianne Ihlen. Som ung vaksen på tampen av det konforme 1950-talet «rømte» ho frå ein småborgarleg heim der foreldra hadde nekta henne å søka teaterskolen. 23 år gammal reiste ho saman med den tre år eldre kjærasten og «beat-forfattaren» Axel Jensen for å busetta seg i kunstnarkolonien på den greske øya Hydra. Resten er kulturhistorie – i dobbel forstand.