Etter ei hyggjeleg jonsokfeiring i Ålesund torsdag la sommarbåten til Klassekampen ut i retning studentbygda Volda på morgonkvisten i går. Sjølv vakna eg i åttetida av at det gynga veldig i den vesle køya mi heilt bakarst i båten. Då eg kom opp på dekk med ein kaffikopp synte det seg at vi hadde sjølvaste storhavet rett på oss frå vest, og dei store havdønningane sette store rørsler i den 76 fot lange galeasen Svanhild. Innover Vartdalsfjorden fekk vi le for både vind og bølgjer, og det klårna opp til å bli ein nydeleg sommardag og ein flott fem timars seglas inn til Volda.