JAKT: 1. desember startar ulvejakta på dyr utanfor ulvesona. 26 ulvar kan fellast. Talet på dyr som skal fellast i sjølve ulvesona, blir avgjort i desember. Blant dei 26 ulvane som kan fellast utanfor sona, er eit nyetablert par i Rendalen/Stor-Elvdal, skriv VG. Dei største vedtekne kvotane som kan fellast, er på tolv dyr i region 4 og region 5 – som omfattar gamle Hedmark og Akershus, og sju dyr i region 3, eller gamle Oppland fylke. Trass i klage på vedtaket frå rovviltnemndene frå både Naturvernforbundet, foreininga Rovviltets Røst og NOAH – for dyrs rettigheter, held Klima- og miljødepartementet fast ved kvoten på inntil tolv ulvar i gamle Hedmark og Akershus utanfor sona. ©NPK