I ein meir enn hundreårig tradisjon har trondheimsstudentane annakvart år feira både seg sjølve og byen. Med eit par tusen friviljuge og eit utal av konsertar, teater og seminar er den tre veker lange Uka-21 landets desidert største kulturfestival. Motoren i det heile er revyen, og sjølv om dette er ein dugnad av glade amatørar, har Uke-revyane vore trendsetjande og nyskapande for norsk revytradisjon, og mange er dei, songane som er blitt del av den norske vise- og allsongarven.